ОДМОР СО КОЛА: Каде не ви треба меѓународна возачка дозвола?
Објавено во: Економија 26 Мај, 2018
Дали треба светлата на автомобилот да се вклучени дење, ми треба ли рефлектирачки елек и противпожарен апарат, каде да точам бензин, кои документи ми се потребни... Ова се дел од прашањата што си ги поставува секој возач пред да тргне на летен одмор со автомобил во странство. И не без причина, бидејќи ако претходно добро се запознаете со сообраќајните правила и прописи во земјата каде што ќе летувате и однапред го испланирате патувањето, може да заштедите време, пари и нерви.
Најомилена дестинација на македонските туристи е Грција, каде што и најмногу патуваат со сопствен превоз поради близината и добрите автопатишта. Во последно време се е поголем бројот на тие што заминуваат на одмор и во Албанија, а Македонците се традиционални гости и во летувалиштата во Турција и во Црна Гора. Од земјите во регионот, многу посетувани се и туристичките места во Бугарија и во Србија.
Во ниту една од овие земји за македонските граѓани не е потребна виза за влез, а во Србија, Албанија и во Црна Гора може да влезете и само со биометриска лична карта, но само ако преку нив само транзитирате и патувате во трета земја, границата мора да ја поминете со пасош. Пред да тргнете на патување надвор од државата со возило, подгответе ги сите неопходни документи. Задолжително ќе ви требаат меѓународна возачка дозвола и зелен картон (осигурување.
Од земја до земја зависи каква дополнителна опрема мора да имате во автомобилот и кои прописи мора да ги почитувате. Во сите земји, без исклучок е забрането да зборувате на мобилен телефон додека возите. Kазните се движат од 25 евра во Бугарија до 100 евра во Грција. Освен во Албанија, во другите земји може да користите хендсри-слушалки. Исто така, секаде мора да се врзувате со ремени, а детските седишта не се задолжителни само во Црна Гора. Средните светла дење не мора да бидат вклучени во Грција и Турција, а во Албанија мора да ги вклучите само во услови на лоша видливост. Ако патувате во Турција, во багажникот мора да имате два триаголника, а кутијата за прва помош е дел од опремата што мора да се има каде и да патувате. Рефлектирачкиот елек не е задолжителен во Грција и во Турција, а противпожарен апарат нема да ви бараат српската и црногорската сообраќајна полиција.
Една од поважните ставки кога се планира одмор со сопствен превоз е трошокот за гориво. Има големи разлики во цените од држава до држава, па затоа треба добро да се испланира каде ќе се точи гориво. Со паметно полнење на резервоарите може да заштедат пари кои ќе ги потрошите на вашето летување, а грубата пресметка покажува дека заштедата може да биде до 20 евра по резервоар.
За македонските возачи најевтино е да полнат гориво на домашните бензински пумпи. Ова особено се однесува ако се оди за Грција, за каде што најдобро е да обезбедат доволно гориво за одење и за враќање или да ја темпираат потрошувачката така што резервоарот ќе го дополнат штом повторно ќе влезат на македонската страна од границата.
(М.Б.)