Оливер Спасовски: Сензационализмот не е основа на водење на истраги
Објавено во: Македонија 21 Февруари, 2020
Техничкиот премиер Оливер Спасовски денеска ја оцени како сензационалистичка истрагата предводена од министерот за внатрешни работи Наќе Чулев која заврши со заплена на еден килограм кокаин во магацин за банани во скопското село Крушопек, каде што како трајна дестинација требало да бидат испорачани 1,3 тони од дрогата.
- Не е важно кога и со кого се води одредена истрага, туку е важно со каков кредибилитет тоа ќе го правите. И да знаете дека сензационализмот не е основа на спроведување на истраги и на акции. Во секоја истрага мора да има сериозна кредибилност и лична одговорност на оној кој што раководи со органот кој ги води истрагите е врвен приоритет, рече Спасовски на денешната прес-конференција со претседателот на парламентарната група „Renew Europe“, Дациан Циолос
Спасовски смета дека информациите на Чулев во јавноста биле избрзани и со тоа била нарушена сеопфатната акција, која заврши со истрага за двајца осомничени и притвор за едно лице.
- Важно е да завршите и на крајот кога ќе завршите тоа да го изнесете пред јавноста и да кажете што е направено. Не е важно да избрзате и да кажете пред јавноста „имам сензација“ а со тоа допринесувате да се загрози истрагата
Не може во одреден момент истрагите да се водат во јавност и преку медиумите, туку треба да се завршат и да се обезбедат докази. Тие кои што причиниле кривично дело да се најдат пред лицето на правдата и правилно да биде информирана јавноста, дополни Спасовски.