ПО БРЕГЗИТ, Шкотска ќе бара нов референдум за независност

Добивај вести на Viber

Шкотска својата иднина ја гледа во големото европско семејство.

Шкотската национална партија најверојатно ќе бара одржување нов референдум за независност на Шкотска, изјави денеска поранешниот шкотски премиер, Алекс Салмонд.

Ова уследи откако граѓаните на Велика Британија се изјаснија за излез од ЕУ, а мнозинството жители на Шкотска гласаа за останување во Унијата.

Салмонд во изјава за „Скај њуз“ кажа дека за Шкотска е разумно никогаш да не ја напушти ЕУ.

На прашањето дали сегашната лидерка на СНП и прва министерка на Шкотска, Никола Старџен ќе инсистира на втор референдум за независност на Шкотска, Салмонд одговори дека таа сигурно ќе го направи тоа.

Старџен претходно денеска изјави дека Шкотска јасно покажала дека својата иднина ја гледа во рамките на ЕУ.

Познатата писателка на серијалот за Хари Потер, Ј.К.Роулинг рекла дека Шкотска ќе бара независност.

„Шкотска сега ќе бара независност. наследството на Дејвид Камерон ќе ги раздели двете унии. Ниту една од овие два работи не смееше да се случи“ - напишала таа на Твитер.

По референдумот во Велика Британија се огласи и Син Фајн, група составена од неколку ирски националистички партии и тие велат дека гласањето за излегување од ЕУ во Северна Ирска мора да преставува референдум за ирското национално единство.