Познато колку време ќе помине од процедурата пред Македонија да стане официјална членка на НАТО

Добивај вести на Viber

Најверојатно година и пол ќе трае процесот од поканата до официјално полноправно членство во НАТО на Македонија, откако генералниот секретар на Алијансата, Јенс Столтенберг, појасни дека на претстојниот Самит на НАТО на 11 и 12 јули во Брисел, земјата ќе добие покана за започнување на пристапните преговори.

По заокружувањето на пристапните преговори ќе биде потпишан Протокол за пристапување кој потоа треба да биде ратификуван од парламентите на сите земји членки на НАТО. Овој процес на ратификација е тој што одзема најмногу време.

За Црна Гора, објасни тој, поканата за почеток на преговори била изададена во декември 2015, преговорите биле финализирани во март 2016, а потоа сите 28 земји членки го ратификувале Протоколот до јуни 2017.

Албанија и Хрватска, пак, беа поканети во април 2008, а се приклучија во април 2009, една година подоцна.

– Зборуваме за нешто како година и половина од поканата до полноправно членство, Но, штом го потпишеме Пристапниот протокол, што трае неколку месеци, три месеци за Црна Гора, тогаш земјата ќе биде поканета да учествува на сите средби на НАТО и ќе седи на маса и ќе биде дел од Советот на НАТО. Црна Гора почна да учествува во сите активности на НАТО во март 2016, само три месеци откако почнаа преговорите за членство – рече Столтенберг.

Тој посочи дека процесот може да оди многу брзо, но за тоа е неопходно да завршат сите процедури околу Договорот со Грција.