ПРЕКРШЕН ЕТИЧКИОТ КОДЕКС: Јовески ја осуди постапката на дел од обвинителите
Објавено во: Македонија 16 Март, 2018
Државниот јавен обвинител, Љубомир Јовески ја осудува постапката на дел од обвинителите во ЈОРМ за објавеното соопштение за кривичниот предмет во врска со трагичната смрт на Алмир Алиу, затоа што смета дека таквото обраќање е непрофесионално.
Тој наведува дека е прекршен Етичкиот кодекс на јавните обвинители во Македонија.
„Како Јавен обвинител на Република Македонија ја осудувам постапката на дел од јавните обвинители во Јавното обвинителство на Република Македонија за објавеното соопштение за кривичниот предмет во врска со трагичната смрт на 4-годишниот Алмир Алиу, бидејќи сметам дека таквото обраќање е непрофесионално и дека со тоа се повредува функцијата јавен обвинител и тешко е прекршен Етичкиот кодекс на јавните обвинители во Република Македонија. Нивната постапка ја доведува под сериозно сомневање независноста, непристрасноста, лојалноста и достоинството на јавниот обвинител, бидејќи нивниот настап е предизвикан од други цели кои не се поврзани со извршување на јавнообвинителската функција“- стои во пишаната изјава на Јовески.
Четворица јавни обвинители од Јавното обвинителство, се против пресвртот што се случи вчера на судењето за случајот со малиот Алмир.Обвинетиот Бобан Илиќ обвинет за смртта на малиот Алмир Алиу од Куманово, нема да одговара за „Убиство со умисла“, туку за „Тешки дела против безбедноста на луѓето и имотот во сообраќајот“, откако обвинителството го преквалификува делото.