Пристигна опрема за создавање вештачки снег на Маврово
Објавено во: Економија 09 Јули, 2018
Опремата во вредност од околу 700 илјади евра за создавање вештачки снег пристигна во ски-центарот Маврово и ќе биде поставена на патеката „Едносед“. Оваа опрема треба да ја продолжи и онака кратката зимска сезона за скијање во Македонија, односно на Маврово.
Современата опрема сe води како самостојна инвестиција на ски-центарот и ќе почне да се поставува од денеска.
Во наредните четири месеци, на патеката во должина од речиси 2 километри ќе бидат поставени 18 шахти, 9 снежни топа и 4 снежни стикови. Целиот систем за правење снег ќе се раководи од компјутерски центар и ќе има 24-часовен надзор на патеката, на количеството снег и на метеоролошката состојба на самата патека.
Снежењето ќе започнe кога ќе се создадат температурни услови за тоа.
„Инвестираме во опрема за создавање снег и ќе обезбедиме услови сезоната за скијање во Центарот да стартува порано од досега, односно уште пред новогодишните празници. Во однос на сегашната состојба за 30 отсто ќе го зголемиме бројот на денови за уживање на снежните патеки и скијачката сезона на Маврово ќе трае околу 100 дена во годината“, вели Огњан Циговски, извршен директор на ски центарот Маврово.