СДСМ: 11 години криминал на претходната власт се главен проблем на ПИОМ
Објавено во: Македонија 25 Март, 2018
СДСМ ги одбива обвинувањата на опозицијата дека не ги исполнила изборните ветувања за два пати годишно зголемување на пензиите и дека со тоа придонела за влошен животен стандард на пензионерите поради се повисоките трошоци за живот.
Од СДСМ велат дека на овој начин ВМРО-ДПМНЕ продолжува со манипулации на јавноста додека состојбата со ПИОМ се стабилизира, а пензиите растат согласно трошоците за живот.
“ВМРО-ДПМНЕ 11 години манипулираше со пензионерите, ускратувајќи го законското право пензиите да се усогласуваат со растот на трошоците за живот. Токму неспособноста и криминалните политики на ВМРО-ДПМНЕ се причината за предизвиците со коишто денес се соочува Фондот за пензинско и инвалидско осигурување. За разлика од таквиот потценувачки пристап на ВМРО-ДПМНЕ, Владата предводена од СДСМ ги покачува пензиите во согласност со растот на трошоците на живот и растот на платите“, соопштува СДСМ.
Тие велат дека, усогласувањето на пензиите од 1 јануари 2018 година изнесува 1,69 отсто, и овој процент на усогласување на пензиите ќе се исплати ретроактивно за јануари, февруари и март 2018 година со исплата на пензијата за март 2018 година.
„Со зголемувањето на минималанта плата и растот на просечната плата, се отвори сприралата за раст на платите, што позитивно влијае и врз идното реално покачување на пензиите. Владата предводена од СДСМ преку успешните економски мерки и Планот за економски раст поттикнува отворање нови работни места, повисоки плати и економски раст. На тој начин ќе се стабилизира состојбата во ПИОМ и се обезбедува сигурност за сегашните, но и за идните пензионери“, тврди СДСМ.