СЕ ЈАВИ И ШЕФОТ НА ДРЖАВАТА ЗА ЈАВНА СОБА: Престапниците да бидат гонети и казнети
Објавено во: Македонија 28 Јануари, 2021
И претседателот на државата Стево Пендаровски се вклучи во осудата на она што се случувало во скандалозната група Јавна соба. Тој бара надлежните органи да ги гинат престапниците согласно законските прописи.
Правото на приватност е загарантирано со највисокиот правен акт – Уставот на Република Северна Македонија. Деновиве сме згрозени што повторно сме сведоци на случајот „Јавна соба”, случај во кој фрапантно се крши приватноста на илјадници жени и девојчиња, понижување, сексизам и насилство кои оставаат трајни последици на нивните животи, вели во изјава за МИА претседателот на државата Стево Пендаровски.
„Барам од надлежните институции соодветно да го истражат случајот, а престапниците да бидат гонети и казнети согласно законските прописи. Одговорност мора да има во најкус можен рок“, вели претседателот.
Доколку не се дејствува сега, се создава можност за креирање на култура на неказнивост за кривични дела со кои се уништуваат животите на илјадници жртви. Како општество, секој од нас треба да покаже солидарност и поддршка на жртвите, да не дозволиме двојна виктимизација. Да дејствуваме веднаш!, вели Пендаровки за МИА, коментирајќи го случајот со „Јавна соба”.
„Се повлеков, не излегував од дома. Полицијата не можеше да стори ништо. Агонијата продолжува“. Ова е само дел од суштината во сведоштвата на две девојки кои решија вчера јавно да проговорат што доживеале откако нивни фотографии биле споделени во групата Јавна соба со илјадници луѓе на Телеграм. Прво проговори Ана која се обрати со видео порака, а потоа и друга анонимна девојка.
Полицијата вели дека и е во траг на групата.
Првата ваква група на социјалните мрежи беше откриена пред една година, кога беа откриени околу 7.000 корисници кои си разменувале експлицитни фотографии од девојки, од кои некои и малолетни . Полицијата тогаш соопшти дека групата „Јавна соба” по преземените мерки е згасната.