Штајнмаер: Тажен ден за Европа и Велика Британија
Објавено во: Свет 24 Јуни, 2016
Министерот за надворешни работи на Германија, Франк Валтер Штајнмаер го изрази своето разочарување од резултатите од референдумот во Велика Британија.
Според конечното пребројување на гласовите противниците на членството во ЕУ добија 51,9% од гласовите. Речиси 16,8 милиони Британци гласале за Брегзит, а околу 15,7 милиони против заминувањето.
„Веста од Велика Британија е навистина отрезнувачка. Изгледа денеска е тажен ден за Европа и Велика Британија"- напиша Штајнмаер на официјалниот Twitter профил на германското Министерство за надворешни работи.
Денеска се очекува и официјално соопштение на претседателот на Европскиот парламент Мартин Шулц. Потоа е закажана и средба на лидерите на главните европски институции на ЕК, Жан-Клод Јункер и на Европскиот совет, Доналд Туск.
Уште не е јасна политичката судбина на британскиот премиер, Дејвид Камерон. Пред гласањето тој беше категоричен дека ќе ја напушти функцијата, ако Британците го поддржат Брегзит.
Едно од лицата од кампањата за напуштање на ЕУ - Метју Елиот, коментира за Ројтерс дека Камерон треба да остане и да го заврши процесот по заминувањето на Велика Британија.
По изненадувачкиот резултат од референдумот веќе избиваат националистичките расположенија. Пред неколку дена екстремнодесничарскиот лидер во Франција, Мари Ле Пен изјави дека ќе свика сличен референдум во Франција. Претходно и националистот, Герт Вилдер побара референдум за членството на Холандија во ЕУ.