Силвана Ристевска, SCIENTIX амбасадор: Природните науки се проект на иднината!
Објавено во: Македонија 14 Мај, 2017
Светот е она што мислите за него, затоа мислете различно, мислете поинаку со диоптрија на освојување на нови знаења и искуства и успехот е загарантиран ,а животот полн со предизвици и промени- вака својата научна и професионална филозофија на полето на природните науки ја објаснува професорката Силвана Ристевска- која три години е SCIENTIX амбасадор за Македонија во европското семејство на наставници и предавачи по природни науки. Оваа функција вели ја разбира како мотив повеќе да се осознаат новите напредни технологии кои се применуваат во образовниот систем во делот на едукацијата за природните науки чиешто истражување во европски па и во домашни рамки се следи со посебен интерес.
Ристевска предава биологија и природни науки во битолското основно училиште “Стив Наумов”. Професијата за неа е вистинско задоволство бидејќи со максимално вложување во нови истражувања, експерименти во училницата, лабораторијата но и со дополнителна и збогатена наставна програма преку неформално образование вели им помага на учениците да ги совладаат овие науки кои години наназад беа главоболка за учениците. Тврди дека ако во минатото предметите како биологија и хемија, а сега веќе и новиот предмет природни науки биле едни од најтешко совладливите, денес нејзините ученици бележат позитивни оценки и први награди на општински, регионални и државни натпревари, што покажува сериозен исчекор кон совладување на нови знаења. На почетокот на месецов таа беше дел од 14 –та Scientix & NextLab работилница во “Училницата на иднината” во Брисел. Искуствата стекнати таму се од огромно значење за развојот и унапредувањето на начинот на презентирање, предавање и изучување на предметите.
“Овие искуства се од непроценливо значење за мене како просветен работник, за колегите наставници како и за учениците.Оваа работилница беше организирана од двете европски платформи Scientix (www.scientix.eu) и NextLab (www.go-lab-project.eu) за 30 најактивни Scientix амбасадори од вкупно 358 од цела Европа, заедно со уште 16 амбасадори на NextLab платформата чија задача е во наредните три години да помогнат во промовирање и вклучување на наставници од природната група предмети на национално ниво. NextLab е европски истражувачки проект на Европската Комисија во рамките на Програмата Хоризон 2020 и е фокусиран со запознавањето на училиштата со истражувањето во областа на природните науки. NextLab ја продолжува мисијата на проектот GoLab промовирајќи иновативни и интерактивни методи во наставата во основното и средното образование” – додава Ристевска.
Добрите практики од Европа според неа треба да се прилагодат и применат во македонскиот образовен систем. Тоа вели може да се направи преку освојување и примена на современи методи во образовниот процес. Платформата за учење преку истражување содржи стотици он-лине лаборатории (www.golabz.eu/labs), над 40 апликации (www.golabz.eu/apps) потребни за истражувачките експерименти и над 500 сценарија (www.graasp.eu) за истражувачко учење кои се креирани од наставниците ширум Европа.
“За подржување на развојот на нови генерации ученици кои ќе се одлучат природните науки да бидат нивен професионален избор, неопходно е нивно оспособување за примарно користење на новите технологии и размена на знаења и вештини со европските врсници. SCIENTIX како европски проект инициран од Европската комисија за истражување и иновации и менаџиран од EUN (European Schoolnet Academy, www.eun.org) во Брисел, ја подржува оваа идеја и наменет е за наставници од основно и средно образование кои предаваат биологија, хемија, физика информатика, географија, математика, инженерство и технологија кои се отворени за збогатување на своите знаења и компетенции според европски стандарди”- објаснува Ристевска.
Проектот SCIENTIXкако што вели е достапен во Македонија од 2014 година,а од оваа година почнува неговата трета фаза SCIENTIX 3. Овој проект го претставуваат единаесет Scientix амбасадори во Македонија.
С.Б.