Словенечката влада го достави предлог законот за ратификација на пристапот на Македонија во НАТО во својот парламент

Добивај вести на Viber

Словенечката влада на синоќешната седница го дефинираше текстот на Предлог-законот за ратификација на Протоколот за пристап на Македонија во НАТО потпишан во средата во Брисел и го достави до националното собрание, познато како Државни збор.

„Западен Балкан е стратешки важен за безбедноста на Словенија, НАТО и Европската унија. Проширувањето на евроатлантската алијанса кон Западен Балкан останува еден од клучните катализатори на напредокот во регионот и обезбедува регионална стабилност.

По усвојувањето на уставните амандмани од страна на македонскиот парламент и ратификацијата на Преспанскиот договор во Грција и Северна Македонија, Северноатлантскиот совет (НАК) го одобри нацрт-текстот на протоколот за пристапување. Протоколот за пристапување беше потпишан од постојани претставници во НАТО. Протоколот беше потпишан во име на Словенија на 6 февруари 2019 година од страна на Јелко Кацин, словенечки амбасадор и постојан претставник во НАТО.

Во согласност со втората статија, протоколот ќе стапи во сила кога секој потписник на Северноатлантскиот договор официјално ќе ги извести Соединетите Американски Држави за неговото усвојување. Соединетите Американски Држави ги известуваат сите потписници на Северноатлантскиот договор од денот на приемот на службеното известување и датумот на влегување во сила на Протоколот“, се вели во соопштението на совенечката влада која го објави синоќа.

Со оваа одлука Словенија ќе биде втората земја по ред која ќе го ратификува Протоколот за прием на Македонија во НАТО. Првата, по логичен редослед и според Преспанскиот договор, треба да биде Грција.

„Државни збор“ се очекува експресно да го следи грчкиот парламент, каде што денеска на дневен ред на пленарна седница е гласањето на ратификацијата на Протоколот откако вчера беше на комисиска расправа.

Словенечката влада веќе не ословува под новото уставно име „Република Северна Македонија“.