Снимката од „Поткуп“ јавноста нема да ја слушне ни денес

Добивај вести на Viber

Иако во јавноста беше најавено дека на денешното рочиште за „Поткуп“ ќе биде пуштена целосната снимка за случајот, сепак Кривичниот суд  одлучи тоа да не се случи денес, бидејќи како што било посочено на денешната расправа во судот , се чека решение од повисока судска инстанца поради поднесената жалба од обвинителството.

 Во случајот „Поткуп“ премиерот Заев е обвинет дека како градоначалник на Струмица од бизнисменот Сачевалиев побарал поткуп од околу 160.000 евра за легализација на градежно земјиште.
Заев и неговите адвокати на минатото рочиште од Судот побараа да не се исклучува јавноста кога ќе се гледа снимката во судница, бидејќи само јавна презентација на целосната снимка ќе може да врати дел од изгубената чест и углед на премиерот.

Иако снимката нема да се гледа денеска, во судницата продолжи рочиштето на кое во тек е сведочењето на бизнисменот Иван Николов кој се наоѓа на снимката заедно со Заев.

Сведокот Сачевалиев пред судот изјави дека на 8 ноември 2013 година, на Митроведен, телефонски бил повикан од Заев во неговиот градоначалнички кабинет во Струмица. Кога пристигнал, Заев му кажал дека го викнал за да му соопшти дека земјиштето за кое бил заинтересиран може да го купи по цена од 70 денари за метар, но под услов да даде уште по три евра – по едно евро за него, за црквата и за СДСМ. Тој му одговорил дека тоа се многу пари и дека за купување на земјиштето имал подготвено 100.000 евра. Заев, наведе Сачевалиев, му покажал хартии на неговото биро за кои му кажал дека се од фирми со кои е завршена работата на истиот начин како што нему му било понудено.

Откако случајот го пријавил во МВР, Сачевалиев, како што појасни, бил препратен во ОЈО, каде му била дадена опрема за прислушување, по што повторно отишол кај Заев. Во меѓувреме Заев му кажал дека ја намалил цената на две евра – за него и за црквата. Се договориле да се сретнат и Заев му кажал дека парите треба да му ги даде на неговиот брат Вице.