Топалов: Бугарија секогаш ја гледала Македонија како роднина

Добивај вести на Viber

Македонците да ги признаат своите историски корени, па патот ќе им биде отворен, изјави  за БНР  професорот Кирил Топалов, член на мешовитата комисија меѓу Бугарија и Македонија.  Тој е категоричен дека Бугарија секогаш ја гледала Северна Македонија како роднина, а обратно – Македонија гледа на Бугарија со жестоко непријателство.

Тој истакна дека непризнавањето на историските корени дава основа за злобна антибугарска пропаганда во Република Северна Македонија, а Бугарите се нарекуваат фашисти или Татари. Рече дека по изборите напролет, курсот нема да се промени. 

„Бугарија го признава идентитетот на Македонците, тоа е од 1944 година, но поентата е дека тие ја фалсификуваат историјата“, рече Топалов.

Прашува може ли дел од бугарското население, меѓу кои има бегалци од Македонија, да прифати дека нивните прадедовци и дедовци не биле Бугари и зборувале небугарски јазик. 

„Ова е апсурдно! Од нив се бара само најмалата работа – да ги признаат своите историски корени, па оттаму нивниот пат ќе биде отворен секаде“, рече Топалов. 

Македонија не се откажува од преговори и наоѓање решение за спорот со Бугарија. Ако Бугарија не го тргне ветото, земјава не може да ги почне преговорите со ЕУ. Во Бугарија деновиве беше промовирана „Бела книга“ која го спори македонскиот јазик и го нарекува скопска норма.