Трамп ќе го „брка“ Тилерсон, шефот на ЦИА главен кандидат
Објавено во: Свет 01 Декември, 2017
Белата куќа е пред нов потрес откако се откри наводен план на американскиот претседател Доналд Трамп да го принуди Државниот секретар Рекс Тилерсон да се повлече од својата позиција, а на негово место да го донесе Мајк Помпео кој е сега директор на ЦИА.
Ваквите тврдења кои ги пренесоа американските медиуми и светските агенции се негирани од страна на Белата куќа од каде тврдат дека Трамп и натаму има доверба во Тилерсон како предводник на Стејт Департментот. Сепак, меѓу двајцата подолго време постојат силни тензии, особено што Трамп ги поткопуваше било каквите дипломатски напори на Тилерсон во однос на Северна Кореја порачувајќи дека џабе се труди.
Информациите кои првично произлегоа од Белата куќа подоцна се негирани и од страна на Стејт Департментот од каде се вели дека Тилерсон ја сака својата работа и планира да остане на оваа позиција и во наредниот период.
Главната причина поради која Трамп е нетрпелив кон Тилерсон е што на една нивна приватна средба во октомври бил тешко навреден. Според сведоци на настанот американските медиуми тврдат дека Тилерсон го опцул Трамп и го нарекол морон.
Затоа од своите соработници побарал да креираат план со кој на негово место би дошол првиот разузнавач Помпео во кој Трамп досега покажа дека има огромна доверба, а тој е дел од военото лоби во неговата администрација, покрај генералот Кели кој сега му е шеф на персонал во Белата куќа.