(ВИДЕО) Официјално мандатот во раце на Заев-на повидок Влада

Добивај вести на Viber

И официјално претседателот Иванов му го врачи мандатот на лидерот на СДСМ Зоран Заев.

Идниот мандатар сега ќе се обиде да состави влада со партиите од парламентарното мнозинство.

Заев ја прочита гаранцијата која му е дадена на претседателот Иванов и е потпишана од Заев.

Гарантирано е дека просецот на носење одлуки ќе биде согласно со Уставот, законите и владеењето на правото.

„Во име на парламентарното мнозинство ја давам следнава изјава:

Прво, гарантираме заштита на унитарноста, суверенитетот, територијалниот интегритет, независноста и мултиетничноста на РМ. 

Гарантираме заштита на Уставниот поредок и територијалната целина на РМ. Гарантираме заштита на државните интереси и унапредување на животот на сите граѓани без оглед на етничката, религиската и јазичната припадност. Гарантираме дека процесот на носење на одлуките за граѓаните на Македонија ќе биде во согласност со основните демократски принципи и владеење на правото, недоведувајќи ја РМ во положба на потчинетост или зависност спрема друга држава. Ниту еден документ, платформа, декларација, акт или дејствие кои би биле спротивни на погоренаведените ставови не може да бидат услов ниту основа за формирање или дејствување на Владата на РМ“, изјави Заев во моментов на доделување на мандатот за формирање на влада од претседателот Иванов.

Сега на Заев му остануваат 20 дена да ја формира Владата, а од она што претходно беше кажано можно е тие 20 дена целосно да не бидат искористени туку новата влада да биде формирана многу порано од законските денови.

Потоа следува избор во Собранието.

Мандатот Заев го доби откако Иванов побара гаранции за зачувување на државата.