ВТОР ДЕН ЖАЛОСТ: Многу е болно кога гледаш како луѓе се простуваат од овој свет барајќи помош
Објавено во: Македонија 15 Февруари, 2019
Македонија тагува. Голем непребол во срцата на оние кои ги загубија најблиските во трагедијата кај село Ласкарци.
Втор ден на жалост. На местото на несреќата останаa само трагите и искрешената банкина кои продолжуваат да сведочат за кобниот 13 февруари. Автобусот сега е стациониран во касарната Ѓорче Петров каде вешатците ќе треба да проверат дали можеби технички дефект довел до сообраќајката.
Сведоштвата за незгодата која во смрт однесе 14 животи не запираат. Оние кои во моментот на превртување на автобусот беа на местото на несреќата кажваат што виделе и како се чувствувале.
Се изгледаше многу хаотично, бидејќи автобусот излета неколку метри под нивото на патот, а од силниот удар остана сплескан, што значи дека голем број луѓе останаа заробени во згужваната лимарија.
-Многу е болно кога гледаш како човек на твои години се простува од овој свет, барајќи помош. Во тој момент се чувствував најлошо на свет од кога знам за себе- видно потресен раскажува сведок на социјалните мрежи откако се затекнал на несреќата.
Знамињата и денес ќе бидат спуштени на половина копје, а во Гостивар и утре.
Засега се знае дека автобусот со 51 патник од Скопје тргнал во 16.15 часот, а со него најчесто патувале јавни службеници и студенти од Гостивар.
Причините за грозоморната несреќа допрва ќе се соопштуваат.