За 40 отсто од новозаразените не се знае од кого го добиле коронавирусот
Објавено во: Македонија 07 Јуни, 2020
Од вкупно 124 лица кои во изминатото деноноќие биле регистррани како новозаболени од коронавирусот, само за 60 отсто било забележано дека имале контакт со потврден случај. Ова го покажува Статистиката на Институтот за јавно здравје.
„Од обработените нови случаи, 70 лица (59,8 отсто) имаат контакт со потврден случај“, се вели во Извештајот на институтот за јавно здравје.
Ова значи дека за 40 отсто од новозаразените, не се знае каде, односно преку кого го добиле коронавирусот.
Инаку, од 124 нови позитивни случаи од 12 градови во државата, најголем дел од регистрираните случаи се од Скопје (37,1 отсто).
Регистрирани се случаи во сите возрасни групи, а најзастапена е возрасната група од 30-39 години, со 27 позитивни. Во однос на дистрибуцијата по пол, пријавени се 67 лица од женски и 57 од машки пол.
Од епидемиолошки обработените случаи, регистрирани се 9 хоспитализирани, а кај 29 лица е регистрирано присуство на коморбидитети.
По добиени два негативни теста за присуство на SARS-CoV-2, како оздравени се водат 8 лица кои биле хоспитализирани или на домашно лекување.