Заев: Договорот за добрососедство со Бугарија е затворање на едно поглавје
Објавено во: Македонија 21 Јули, 2017
Договорот со Бугарија отвара сериозни перспективи за Македонија, а од него Македонија има сериозна придобивка, изјави премиерот Зоран Заев денеска во Штип.
Договорот ќе биде склучен кога ќе го ратификува Парламентот, додава премиерот. Тој објасни дека договорот за добрососедство со Бугарија е затворање на едно поглавје, што било проблематично во изминатиот период.
„Договорот се носи од Парламентот. Парламентот на крајот гласа. Ако е нешто на штета на Македонија, нашиот Парламент има директна одговорност кон граѓаните и не треба да се плашиме. Ако е нешто добро, Парламентот ќе гласа. Јас како добро упатен политичар, којшто и понатаму бара поддршка од граѓаните, нема да дозволам влакно да и фали на Македонија во нејзините перспективи“ - вели Заев.
Од ВМРО-ДПМНЕ и понатаму бараат на јавна седница да се разгледува нацрт договорот кој на Илиден треба да се потпише со Бугарија.
„Ако договорот е добар и ако договорот решава проблеми како што велат СДСМ, нема зошто да го кријат. Ако договорот е добар тие ќе добијат поддршка и од Собранието и од граѓаните“ - велат од ВМРО ДПМНЕ.
Јавноста ќе има увид и ќе добие време за да дебатира за договорот за добрососедство со Бугарија, изјави синоќа во интeрвју за телевизија 24 министерот за надворешни работи, Никола Димитров.