Заев: Ќе се извади двојазична табла во Струмица
Објавено во: Македонија 02 Март, 2020
Зоран Заев, претседателот на СДСМ, денеска најави дека двојазична табла што стои пред зградата на Јавното правобранителство во Струмица ќе биде за брзо време тргната. Според лидерот на владеачката партија, не треба да има двојазични табли во општините каде што нема етнички заедници чиј процент не надминува 20 отсто. Тој додаде дека вакви табли се тргнати и во Кочани и во некои други места.
Заев ова го напомена откако неодамна беа искршени двојазични табли на две подрачни државни институции во Велес и прилеп, а вицепремиерот за евроинтеграции Бујар Османи толкуваше дека таму сепак тие се нашле прописно.
- Ја сум информиран и дека на Јавното правобранителство во Струмица стои двојазична табла која што верувам дека брзо и веднаш ќе ја отстранат, заради тоа што немаме повеќе од 20 отсто (граѓани од албанска националност) и нема кој да го користи албанскиот јазик во Струмица, рече Заев меѓудругото одговарајќи на новинарско прашање на денешната прес-конференција.
Заев додаде дека во Струмица има само едно семејство Албанци-пекари кои го прават струмичкиот бурек.
- Но тие го зборуваат увабо и македонскиот јазик и секако само едно семејство не се 20 отсто. Како што реков, во Кочани беше отстранета и во некои други места се отстранети, така да законот треба да се применува низ призмата на практичната потреба, а не за исилување на една заедница врз друга заедница, смета Заев.
Османи вчера посочи дека доколку општината со својата државна подрачна единица покрива најмногу една општина во која се зборува јазик на малцинските заедници согласно Законот, тогаш треба да има двојазична табла.
„Во Велес тоа е Чашка, а во Прилеп – Долнени“, рече Османи.
Претседателот на СДСМ, Зоран Заев, претходно на ТВ-дуелот во петокот рече дека поставувањето на двојазичните табли насекаде низ Македонија можеби не било добро обмислено.