Заев: Опозицијата слободно да се радува на одлуката за преговори со ЕУ

Добивај вести на Viber

Претседателот на СДСМ, Зоран Заев, во своето јавување во емисијата „Утрински брифинг“ ја повика опозицијата, како што вели тој, слободно да се израдува на успехот со доделувањето на почеток на преговори од страна на Европската Унија.

„Очекував честитка, затоа што ова беше борба која ја воделе сите генерации, сите политички гарнитури, сите влади, од кои некои повеќе некои помаку. Ова беше процес кој започна во 2001 со Договорот за стабилизација и асоцијација, а потоа и во 2005 со кандидатскиот статус. Треба да се радува и опозицијата. Имаме ние други битки со нив, но вчера беше ден на радост. Опозицијата требаше да најде доблест да честита“, рече Заев.

Лидерот на владеачката партија со извесна доза беше критичен и кон Брисел и порача дека вчерашната одлука требало да биде донесена многу порано.

„Овој парламентарен состав ги исполни двете најголеми стратешки цели на државата, а Европа конечно ја исправи историската грешка. Навистина направија грешка. Еднаш ни одложија 2018, па ни одложија во 2019 во јуни и октомври. Проблемот беше пакетот со Албанија. Се ни е јасно. Тоа беше неправда кон нашиот народ, но ете сега едногласно, консензуално во ситуација на канцеларии под изолација, на заразени премиери, во едни такви околности министерскиот совет на ЕУ ја донесе одлуката“, додаде Заев.

Тој најави дека во следниот период ќе следува зголемување на професионаниот капацитет на преговарачките тимови за отворањето на поглавјата кои треба да се исполнат. 

„Верувам дека до 2024 ќе бидат отворени 80 отсто, а голем дел и затворени. Тоа ќе значи и поголем економски стандард и начин на живот за граѓаните“, смета Заев.