Заштита на околината-услов за инвеститање на меѓународните финансиски институции во хидроелектрани на Балканот
Објавено во: Мои пари 26 Ноември, 2017
Државните електростопанства на земјите од Балканот сметаат дека меѓународните финансиски институции, како што се Светската банка и Европската инвестициска банка, треба повеќе да ги финансираат новите проекти за изградба на хидроелектрани на Балканот.
Ова беше изнесено на дебатата на конференцијата Hydro Power Balkans 2017 која се одржа во Подгорица, Црна Гора, на која се дискутираше за проблемите во планирањето и изградбата на нови хидроелектрани.
Учесниците од земјите од регионот се согласија дека е потребно забрзување на сложениот процес на усогласување на дел од локалните закони со законите на Европската унија во делот на заштитата на животната средина, бидејќи меѓународните финансиски институции влегуваат во финансирање само на проекти за нови хидроелектрани кои ги запазуваат високите стандарди на ЕУ за заштита на околината.
Претставниците на АД ЕЛЕМ на конференцијата ја изнесоа заложбата за нужно инвестирање во производство на овој вид електрична енергија, како чиста и долгорочно најисплатлива и во тој правец ги презентираа идните развојни проекти, хидроелектраните Чебрен и Галиште и дел од Вардарска долина. Со оглед на тоа што овие проекти не се наоѓаат во заштитени подрачја за кои важат посебни одредби, истите предизвикаа интерес кај меѓународните инвеститори, како и кај производителите на опрема, присутни на конференцијата Hydro Power Balkans.
АД ,, Електрани на Македонија,,