Ангеловска: Сите граѓани што ги исполнуваат условите, а не се избрани поради техничка грешка, ќе ги добијат картичките

Добивај вести на Viber

Сите граѓани што ги исполнуваат условите, а кои не се на листата на добитници поради некоја техничка грешка, таа ќе биде исправена и овие граѓани ќе ги добијат картичките. Но, за тоа ќе биде потребен период од неколку дена, со цел институциите да проверат дали граѓаните навистина не се добитници поради техничка грешка, или не ги исполниле критериумите. 

Бројот на претставките од граѓаните, но и младите луѓе, што не се нашле на списокот дека ќе ги добијат платежните картички, расте, и тој ќе ја надмине бројката од 20 илјади. 

Ова го објасни во интервју за Утрински брифинг на Слободен печат министерката за финансии, Нина Ангеловска. 

„Според моите информации што ги имам од Генералниот секретаријат на Владата, бидејќи таму стигнуваат претставките, бројот на претставки кои изнесуваа 20.000 претставки, сега е зголемен. Како што е познато, рокот за поднесување на приговорите е до утре. Покрај приговорите, има и голем број прашања, а тие се однесуваат на прашања од граѓаните зошто, на пример, една група е вклучена, зошто друга не е вклучена, како ќе се користи картичката и слично. Навистина се пристигнати огромен број на мејлови, работат 10 лица на категоризација и одговарање на мејловите. За сите каде се работи за техничка грешка, а граѓаните ги исполнуваат условите, грешката ќе биде исправена и ќе ја добијат картичката. Но, мора да се има предвид дека тоа ќе потрае неколку дена, бидејќи до утре е рокот до кој пристигнуваат приговорите. Потоа мејловите ќе се достават до соодветните институции, со цел да се види дали се работи за техничка грешка, или лицето не ги исплнува условите. Значи, сите што ги исполнуваат критериумите, ќе ги добијат картичките. Но, процесот ќе потрае неколку дена“, вели министерката Ангеловска.