Анѓушев: Македонските компании со голема помош ќе станат партнери на инвеститорите
Објавено во: Економија 21 Февруари, 2018
Вицепремиерот за економски прашања Кочо Анѓушев пред почетокот на тркалезната маса со Советот на странски инвеститори и Машинскиот факултет во Стопанската комора на Македонија најави нова категорија на мерки на државна помош наменета за домашните мали и средни компании со цел да ја подобрат нивната понуда и да ја зголемат соработката со странските инвеститори во Македонија.
Според актуелните состојби само 1% од добавувачите на странските компании во зоните се македонски компании и тоа само со неизбежните производи и услуги како достава на храна, струја, услуги за обезбедување и слично. Според најавите на вицепремиерот Анѓушев оваа програма ќе биде дел од третиот столб и малите и средните компании ќе може да аплицираат преку Фондот за иновации.
Предвидени се два вида на конкретни мерки со покривање на 70% од трошоците за иновативен производ и до 30% за производствени хали за компаниите во развој. Претседателот на Советот на странски инвеститори Штефан Петер ја поздрави новата програма на Владата која според него е транспрарентна и ќе придонесе да се подигне квалитетот на понудата на македонските компании.
Петер вели дека македонските компании треба најпрво да ги видат потребите на странските инвеститори и согласно тоа да изготват квалитетна и ефикасна понуда од што корист ќе имаат и тие бидејќи ќе добиваат услуги и производи од Македонија што значи и пониски трошоци за транспорт и давачки.
Вицепремиерот Анѓушев надополни дека со предвидените мерки на владата за финансиска помош околу 7000 компании ќе имаат бенефиции за развој и унапредување, наместо со претходно потрошените 220 милиони кои ги искористија само дваесетина компании.
Х.С.