Апелација ги уважи барањата за притвор на Грујевски и уште двајца обвинети
Објавено во: Македонија 18 Јули, 2017
Апелациониот суд во жалбена постапка ги одобри првите барања на СЈО за одредување на мерка притвор за предметите „Таргет“ и „Тврдина“ меѓу кои и за првообвинетиот екс началник на Петтата управа на УБК Горан Грујевски.
- Апелациониот суд Скопје по одржаните седници на ден 17.7.2017 година донесе одлуки во предметите познати во јавноста како „ТАРГЕТ“ и „ТВРДИНА“, со кои за тројца обвинети ја уважи жалбата на Јавно обвинителство за гонење на кривични дела поврзани и кои произлегуваат од содржината на незаконското следење на комуникациите Скопје, на начин што ги преиначи првостепените решенија и жалбите на Обвинителството ги уважи, а према обвинетите Г.Г., Н.Б и Т.Ј. заради обезбедување присуство на обвинетите во кривичната постапка, определи мерка притвор, додека за останатите обвинети се потврдија првостепените решенија, со тоа што жалбите на обвинетите, како и на Обвинителството, се одбиени како неосновани, стои во соопштението на Апелација.
Во Тврдина СЈО води обвинение за уништување на опрема за прислушкување и документација, додека пак во Таргет на „мета“ се обвинети кои вршеле незаконско прислушкување на илјадници лица од Република Македонија за нивните општествени и политички ставови. Грујевски веќе еднаш беше во притвор, но потоа одлуката беше поништена од страна на второстепен орган.