Банките законски ќе бидат должни да одржуваат ред и растојание
Објавено во: Економија 19 Април, 2020
Владата на својата 44-та седница што се одржа синоќа го задолжи Министерство за финансии,со препорака и до Народна банка, во заедничка соработка да ја разгледаат можноста за предлог – уредба со законска сила со која деловните банки во рок од еден месец ќе бидат обврзани да воведат нови финтек апликации со кои значително ќе се намали интеракцијата и бирократските процедури за граѓаните, како и за микро, мали и средни компании.
Министерството за финансии има задолжение да подготви и за наредната седница на Владата да достави уредба со законска сила со која правно ќе се нормираат обврските на банките во поглед на обврската за носење на заштитна опрема на вработените лица и начинот на имплементирање, број на лица во објектите согласно квадратурата на објектот, одржување на редот во и пред објектите и др.
- Се задолжува Министерството за финансии, во соработка со Министерството за информатичко општество и администрација да предвиди конкретни предлог – мерки со кои банките ќе можат да го стимулираат менувањето на навиките на граѓаните, ќе се софистицираат процесите и ќе се преиспита начинот на издавање на документацијата и на самата документација при барањата за кредитирање и исплати (поевтини токени, дигитални идентификација и сл.), се додава во информациите што произлегоа од синоќешната седница.
Владата го задолжи Министерството за финанси во заедничка соработка со Народна Банка да го уредат прашањето за деловните банки задолжително да ги поврзат пос терминалите во економските оператори со фискалните каси.