БЕРЗА: Инвеститорите најзаинтересирани за акциите на Алкалоид АД Скопје
Објавено во: Економија 28 Март, 2017
Инвеститорите во првиот ден од неделава најмногу тргуваа со акциите на најголемата фармацевтска компанија во земјава.
Акциите на Алкалоид АД Скопје го привлекоа нивното внимание при што беа најтргувани на Македонска берза и единствени акции со промет над милион денари.
Хартиите од вредност на фармацевтскиот гигант остварија 1,5 милиони денари промет со истргувани 273 акции по просечна цена од 5.700 денари.
Листата на добитници ја дополнија и акциите на Адинг Скопје со раст од 9,55 отсто со истргувани 5 акции по просечна цена од 700 денари и РЖ Услуги со раст од 2,04 проценти и истргувани 12 акции по просечна цена од 100 денари.
Пад на вредноста на акциите пак имаа хартиите од вредност на Топлификација Скопје.
Во текот на вчерашното тргување берзата оствари 4.414.697 милиони денари вкупен промет преку 26 трансакции.
МБИ 10 индексот ја стартуваше неделата со незначителен пад од 0,05 отсто и заврши на 2.263,03 индексни поени.