Битиќи дава надеж за угостителите и туризмот: Ќе има пари и поддршка
Објавено во: Економија 09 Септември, 2020
Со поддршката од четвртиот сет мерки ќе им се помогне на оние на кои најмногу им треба помош. Вицепремиерот за економски прашања Фатмир Битиќи вели дека ќе се поддржат вработените и компаниите од угостителството и туризмот. Ветува дека ќе има напори за да се задржат на работа што повеќе луѓе од овие сектори. Тој вчера се сретна со претставниците на Независната угостителска комора (НУК).
„Четвртиот сет на мерки, којшто интензивно се подготвува, ќе биде сеопфатен и ќе пружи вистинска поддршка токму на оние на кои таа им треба. Угостителскиот и туристичкиот сектор, се уште се далеку од посакуваното ниво, а Владата ќе ги направи сите напори да ги поддржи вработените и компаниите од овие сектори и да зачува колку што е можно повеќе работни места за граѓаните, рече Битиќи.
Угостителите и туристичките работници во неколку наврати бараа продолжување на економската помош од државата за надминување на кризата. Туристичките работници најавија дека ќе организираат и нови протести, доколку Владата не им излезе во пресрет и не ги исполни нивните барања.