Блокиран Советот на Гази Баба - советниците постапуваат по наредба на Груевски
Објавено во: Македонија 04 Декември, 2017
Новиот градоначалник на општина Гази Баба, Борис Георгиевски денеска информираше дека советничката група на ВМРО-ДПМНЕ ја блокирала работата на општина Гази Баба.
Георгиевски вели дека причината за блокадата било солидаризирањето на советниците со притворените учесници и организатори на насилниот упад во Собранието на 27 парил. Со оваа постапка, тие спречиле донесување нацрт буџет на општината.
Градоначалникот вели дека наместо да одберат развој и буџет на општината, ВМРО-ДПМНЕ одбра да постапи по наредба на Никола Груевски.
„Ова не е прв пат ВМРО-ДПМНЕ да се обиде да ја блокира работата на Советот на општината. Оваа блокада која денеска ја прават значи опасност да се исплаќаат плати, да се реализираат веќе започнатите активности, со еден збор блокада на системот на општината, која е на директна штета на граѓаните“- вели градоначалникот Георгиевски.
ВМРО-ДПМНЕ со оваа постапка на блокада го спречувала реализирањето на шест проекти во општината, потенцирајќи дека истите се во интерес за подобри услови за живот на граѓаните.
„Ако ВМРО-ДПМНЕ тоне, не дозволувам да не повлече и нас. Токму затоа согласно овластувањата, а се со цел да не трпи општината и граѓаните. Заедно со администрацијата во општината Гази Баба и советниците од советничката група на СДСМ и коалицијата, во текот на оваа недела ќе ги завршиме сите планирани средби со граѓаните, бизнис секторот и невладините организации за нивните барања за да не трпат обврските кои ги има општината. Доколку советниците на ВМРО –ДПМНЕ не се вразумат и продолжат со блокирањето на буџетот ќе одиме со мерката времено финансирање на општината“- додаде градоначалникот Георгиевски.
Тој и порача на советничката група на ВМРО-ДПМНЕ дека протестираат на погрешна адреса и според него, општината Гази Баба не е кривичен орган и не притвора никого.