Царовска: Користење надоместок во случај на невработеност побарале 3.900 лица
Објавено во: Економија 03 Мај, 2020
Бројот на отпуштања поради кризата предизвикана од Ковид-19 досега не е драстичен, а лицата коишто останале без работа веќе поднеле барања за користење на надоместок во случај на невработеност, или за влез во системот на социјална заштита согласно условите коишто ги исполнуваат. Ова го кажа вицепремиерката за економски прашања, Мила Царовска, во емисијата „Трилинг" на ТВ 24.
Во Агенцијата за вработување се поднесени околу 3.900 барања за користење на надоместокот во случај на невработеност.
„Досега се решени 1.800, а 1.900 се во обработка, додека само 100 се негативни што значи дека има поднесено ваков тип на барања и позитивно се решаваат во најголем дел и тој систем на поддршка си продолжува за работниците“, рече Царовска.
Според неа, тоа укажува дека системот повторно ги превзема граѓаните и дека државата има одредена заштитна функција.
Вицепремиерката рече дека во тек се разговори и консултации со синдикатите, граѓанските здруженија и преставници од Владата за да се направи баланс меѓу работодавачите и работниците во уредбите што ги носи Владата.
„Целта е двете страни да имаат придобивка од мерките коишто ги носиме и јас сум сигурна дека ќе постигнеме таков договор, се со цел да можеби одредена фирма досега ако отпуштила работници, да може да ги оствари субвенциите за да може да ги задржи останатите вработени. Секако и вработените да добијат одредени бенефиции или одредена поддршка од страна на државата“, нагласи Царовска.