Црна Гора ја гаси националната авиокомпанија
Објавено во: Економија 25 Декември, 2020
Новата црногорска влада донесе одлука да ја затвори националната авиокомпанија Монтенегро ерлајнс, која работи со загуби со години, а истовремено најави дека ќе основа нова компанија.
Министерот за капитални инвестиции Младен Бојаниќ на прес-конференцијата изјави дека затворањето за државата ќе чини околу 50 милиони евра.
„Големата жаба треба веднаш да се проголта. Не постои единствен законски начин да се спаси таа компанија “, рече Бојаниќ, пренесе Хина.
Тој додаде дека работниците не земале плата последните два месеци и дека не им биле исплатени придонеси од 2016 година.
Повеќето авиони се изнајмени и компанијата практично нема средства, рече министерот за финансии Милојко Спајиќ. Тој додаде дека е формирана работна група која ќе се занимава со формирање на нова авиокомпанија.
Вкупната помош на државата за Монтенегро ерлајнс од 2012 година изнесува 155 милиони, а загубата во првите девет месеци од 2020 година изнесува 14,9 милиони евра.
Црна Гора ја основаше Монтенегро ерлајнс во 1994 година додека беше во соработка со Србија, а првиот лет беше извршен во 1997 година. Флотата денес се состои од три авиони Ембраер 195 и еден Фокер 100, а компанијата вработува нешто повеќе од 300 работници.