Димитриевски тврди го нападнале полицајци во цивилка, МВР му поднесе пријава

Добивај вести на Viber

Пратеникот Максим Димитриевски од редовите на СДСМ денеска повторно пред медиумите изјави дека бил нападнат од група на алкохолизирани гости во кафаната во која имал семејна прослава и побара професионалците од МВР да ги идентификуваат напаѓачите.

- Добивам информации дека напаѓачите се од редовите на МВР, а би сакал да ги повикам вистинските професионалци во МВР да го расветлат случајот. Дали надлежните служби ги идентификувале и им направиле алкотест на тие лица? На нападот му предходеа класични провокации на политичка основа. Се сомневам дека лицата се од Куманово но во интерес на истрагата не би коментирал повеќе од тоа - изјави Максим Димитриевски.

СВР Куманово соопшти дека против лицето М.Д. ќе биде поднесена пријава за физички напад врз М.А. исто така од Куманово на кој му удрил тупаници во лицето и му скршил два заба. Инцидентот го пријавил вработен во ресторанот, а подоцна и таткото на момчето. 

- Полициските службеници од СВР Куманово излегле на местото на настанот и констатирале дека оштетениот со своите пријатели бил гостин во ресторанот и на музиката им порачал одредена песна, но по кратко време кога музиката престанала, истиот се упатил кон оркестарот за да праша зошто запреле, и му се приближило лицето М.Д кој исто така бил на семејна прослава, и во присуство на повеќе гости го удрил во пределот на лицето два пати со што му нанел телесни повреди. При преземање на потребните мерки и активности обезбедени се лица сведоци кои биле присутни за време на настанот кои го потврдуваат истиот, стои во дневниот билтен на кумановската полиција.

Од ВМРО-ДПМНЕ го осудија инцидентот во кој учествувал пратеникот Димитриевски посочувајќи го како насилник. 

„Насилникот Димитриевски, без никаков повод и причина се дрзнал со тупаници да нападне и да се пресмета со 23 годишно момче само заради тоа што не му се допаднала македонската песна која што била нарачана. Насилството на криминалците и предавниците од СДС мора да биде санкционирано“, велат од ВМРО-ДПМНЕ.

СДСМ, пак застана во одбрана на Димитриевски бидејќи е недозволиво да биде нападнат пратеник.

„Насилството врз легитимно избрани претставници од граѓаните е израз на немоќ на засегантите од демократските промени што носат правда за сите во Македонија“, велат од СДСМ.