Додека нема списоци нема ни 6.000 денари: Граѓаните да не одат во банка по парите

Добивај вести на Viber

Банките ги потпишале договорите со Владата за исплатата на државните 6.000 денари, но од Македонската банкарска асоцијација (МБА) информираат дека исплатата уште не е започната. Еднократната финансиска помош е наменета за ранливи категории граѓани и овојпат ќе се префрлува на трансакциски сметки на примателите, а тие ќе можат да ги трошат исклучиво во продажни објекти за купување македонски производи и услуги, со дебитна картичка. 

„Банките потпишаа договори со Владата и подготвени се да почнат со исплата на средствата веднаш откако ќе ги добијат и обработат податоците и ги добијат средствата, согласно листите за исплата. Во моментов, исплатата се уште не е започната. Дотогаш, ги повикуваме граѓаните – корисници на оваа мерка, поради заштита на јавното здравје, да се воздржат од посета на филијалите и експозитурите на банките. Сакајќи да имаме уште еден успешно спроведен проект, кој овојпат има значително пократок рок за реализација, нагласуваме дека сите банки во целост ги ставаат на располагање своите филијали и вработени, притоа до одреден степен ставајќи ги во втор план активностите кои се дел од секојдневното работење, стои во известувањето од МБА.

Додаваат дека активностите се веќе интензивно започнати преку повикот до граѓаните за ажурирање на личните податоци што е законска обврска и услов за исплата на средствата па веќе се забележувала поголема фрекфенција на клиенти во филијалите на банките и обраќања кон Контакт центрите.