Државни гаранции за кредити на фирмите: Во Гарантниот фонд има 10 милиони евра

Добивај вести на Viber

Вкупно 10 милиони евра предвиде Владата за Гарантниот фонд од кои ќе се издаваат гаранции за кредити на фирмите. На вчерашната владина седница беше усвоен Предлогот на законот за изменување и дополнување на Законот за Македонската банка за поддршка на развојот. Во него, како што велат од Владата, се поставени контурите на државната гарантна шема, дел од сетот на економски мерки за справување со ефектите од пандемијата КОВИД-19. 

Со законското решение се предлага дополнување на активностите на Развојната банка на Северна Македонија за реализација на проекти и/или програми на Владата со издавање гаранции од Гарантен фонд. 

„Средствата на Гарантниот фонд, во предлогот на законот е предвидено да се користат за издавање гаранции за обезбедување на плаќања по основ на главница на новоодобрени кредити за обртни средства до 80% од износот на кредитот и кредити за основни средства до 50% од износот на кредитот, согласно добрите пракси во европските земји. Крајните корисници на гаранциите може да бидат микро, мали и средни трговци, како и големи извозно-ориентирани трговски друштва во кои приходите по основ на извоз имаат учество од најмалку 30% во вкупните остварени приходи во претходната фискална година.За работењето на Гарантниот фонд, Развојна банка ќе објавува податоци на својата веб страна на квартална основа, а Министерството за финансии на својата веб страна ќе објавува полугодишни извештаи за фискалните ризици на Гарантниот фонд, стои во соопштението од Развојната банка. 

Предлог законското решение, пред да влезе во владина постапка беше поставено на јавна дискусија на ЕНЕР. Со усвојувањето на предлогот на законот од страна на Собранието, ќе се создаде законската рамка за отпочнување на државната гарантна шема.