Две опции за „Веибо“- повторно обновување или стечај
Објавено во: Македонија 19 Февруари, 2018
Две опции за „Веибо“, стечај или нов капитал со што би продолжила компанијата да работи и би се раздолжила кон своите доверители, соопшти вицепремиерот за економски прашања Кочо Анѓушев.
– На еден или на друг начин вработените во Крива Паланка ќе ги земат своите заостанати плати. Среќна околност е што во стечајната постапка би имало повеќе капитал за надмирување отколку што има обврски кон сите доверители вклучително и вработените на кои им должи три плати, рече Анѓушев во одговор на прашање по потпишувањето договор за државна помош со германската компанија „ВИК“ во Владата.
На двочасовниот состанок помеѓу вицепремиерот и сопственикот на „Веибо груп“ се зборувало за тоа како фирмата дошло до ова ниво, што било договорено со претходната влада, што не се исполнило, како не се нашла доволно работна сила( инаку било договорено да се вработат 2000 работници за плата од 150 евра)и ред други прашања.
– Сопственикот не успеал да обезбеди доволна работа и нема доволна ликвидност на компанијата и во моментов ја изгуби деловната активност. Неговата сметка е блокирана и на вработените им должи три плати, во висина од околу 300 илјади евра, и заостанати побарувања од други доверители, пред се од градежни компании кои граделе во неговиот капацитет и од една од македонските банки во вкупна вредност од 700 илјади евра. Има две можности за решение на проблемот да донесе капитал и да се раздолжи кон сите доверители и да продолжи да работи или да оди под стечај доколку поминат 45 дена од неговата блокада, појасни Анѓушев.