Елвис Бајрам повреден во масовна тепачка за изборни плакати
Објавено во: Македонија 03 Октомври, 2017
Елвис Бајрам го извлекол подебелиот крај во масовна тепачка која избила во населбата Шуто Оризари, наводно поради кавга за изборни плакати на противничка партија.
Според изјавите на Курто Дудуш, актуелниот градоначалник на Шуто Оризари со свои приврзаници дошол до штабот на противкандидатот поддржан од СДСМ и таму започнале да ги тргаат неговите плакати. Тогаш реагирал сопственикот на куќата каде е сместен штабот, започнале физичка пресметка, а се вмешале и луѓе од соседството. Елвис Бајрам завршил со расекотини и повреди на главата.
„Јас сум повреден со шипка, а градоначалникт со шипка и секира и апелирам да се превземат мерки.“ - вели Аднан Мемет, помошникот на Елвис Бајрам.
Пред болницата беа собрани поддржувачи на Бајрам, како и неговиот татко пратеникот Амди Бајрам кој повика МВР во најбрзо време да го расчисти инцидентот.
„Министерот да го спроведе по закон, дали е нашата страна виновна, ако е да го притвори. Јас сум лидер од 1995 на Сојузот на Роми и имаме штабови во Шуто оризари, на сила избори не сакаме.“ - вели Амди Бајрам.
СДСМ најостро ја осуди пресметката и го повикува Министерството за внатрешни работи да го расчисти инцидентот и да ги пронајде виновниците.
„Ги повикуваме сите граѓани и политички субјекти да не подлегнуваат на провокации и да останат посветени на спроведувањето фер, слободни и демократски избори“ - се наведува во соопштението на СДСМ.
За ВМРО-ДПМНЕ ова преставува уште едно грубо и брутално нарушување на изборниот процес. Според партијата постојат серија на груби прекршувања на изборниот закон и инциденти на кои полицијата и институциите на владата предводена од СДСМ молчат.