Ердоган: Нападот во Реина има за цел да не сврти едни против други
Објавено во: Балкан 04 Јануари, 2017
Турскиот претседател Реџеп Таип Ердоган изјави дека нападот во ноќниот клуб Реина во Истанбул има за цел да ги сврти Турците еден против друг и да ги продлабочи линиите на поделба, но истакна дека земјата нема да падне во оваа стапица, пренесоа американските медиуми.
Ердоган даде свој коментар во говорот емитуван во живо од Анкара. Ова е негова прва јавна изјава пред нацијата по нападот во ноќниот клуб на новогодишната ноќ, каде загинаа 39 лица.
„Исламска држава" ја презеде одговорноста за терористичкиот акт, чиј сторител не е фатен.
Одговарајќи на обвинувањата од минатото дека Турција дала поддршка на ИД, Ердоган изјави дека „да се претставува земјата, која е на чело на најголемата битка против ДАЕШ, „Исламска држава", како поддржувач на тероризмот, е она што го сака терористичката организација ".
Ердоган истакна дека во Турција начинот на живот на ниту еден човек не е загрозен. Оние кои тврдат тоа, треба да го докажат. Мој долг е да ги бранам правата на секој еден, истакна претседателот.