„Фејсбук“ со сензационален раст на профитот, мрежата стигна до бројка од 1,9 милијарди корисници
Објавено во: Финансии 02 Февруари, 2017
Социјалната мрежа Facebook ги надмина сите очекувања за финансиски резултати во последниот квартал на 2016 година.
Приходите на компанијата скокнаа со 51 отсто на годишно ниво до 8,81 милијарди долари. Аналитичарите предвидуваа приходи во износ од 8,51 милијарди долари.
Профитот на најголемата социјална мрежа во светот се удвои до 3,57 милијарди долари од 1,56 милијарди долари една година порано. Компанијата на Марк Закерберг забележа добивка по акција во износ од 1,21 долари, додека пред една година таа изнесуваше 54 центи. Нето добивката е 1,41 долари по акција наспроти 79 центи година порано и 1,31 долари, како што очекуваа аналитичарите .
Самиот Закерберг се пофали на својот профил на Facebook дека корисниците на мрежата веќе се близу 1,9 милијарди, и дека 1,2 милијарди од нив влегуваат во сајтот секој ден. Над 65 милиони мали бизниси пак го користат Facebook за да се поврзат со нивните клиенти.
„Главниот фокус продолжува да биде ставањето Видео на нашите апликации. Над 150 милиони луѓе веќе го користат Instagram Stories секојдневно. Пуштивме камера и во Facebook Messenger.
Имаме уште многу работа за изградба на нашата заедница каква што сакаме да биде - информирана, поддржувачка, безбедна и сила за креации на добро во светот“, пишува уште Закерберг .