„ФИЛИП МОРИС“ НЕМА ДА ОТПУШТА РАБОТНИЦИ ВО МАКЕДОНИЈА:Нема ниту намалување на платите
Објавено во: Економија 20 Мај, 2020
Компанијата „Филип Морис“ изминатиов период донела одлука дека нема да бидат отпуштани
вработените во оваа компанија, ниту во фабриките во светот, ниту во нашава
земја. Во денешното интервју за Фактор ова го потврди Михаел Солтер, првиот
човек на компанијата Филип Морис. Тој зборува дека во овој период додека трае
пандемијата на Ковид-19, на работниците нема да им биде намалена ниту платата,
а истовремено ќе може да си ги користат и деновите од одморот.
-Промената е нешто што ние во Филип Морис многу добро го знаеме бидејќи кај нас има константни промени во барање подобри решенија кои сега ќе ги бараме во секојдневието. Наместо да имаме долги состаноци во канцеларија, ќе имаме кратки состаноци онлајн. Ќе држиме соодветно растојание и ќе внимаваме на личната хигиена што во принцип треба да биде така, ама никогаш не сме внимавале на некои нешта кои значат многу во моментов, вели Солтер.
Според него, предизвикот на компаниите во ваков кризен период бил работата да продолжи непречено, истовремено зачувувајќи ја безбедноста и здравјето на луѓето.
-Нашата филозофија е дека нашите вработени го создаваат успехот на компанијата, па во ситуација на големи предизвици како овој со COVID-19, компанијата функционира во насока на целосна поддршка на вработените. Беше донесена одлука дека нема да има никакви отпуштања во периодот додека трае пандемијата, на никого нема да му биде намалена платата и секој ќе може да ги искористи деновите од одмор и да помине квалитетно време со своите блиски. Оваа ситуација бара исклучителна прилагодливост, па зошто би ја задушувале креативноста на вработените за иновативни решенија со прашања дали ќе ја задржат работата или пак дали после сите ограничувања во движењето ќе имаат денови од одмор да поминат со своите најблиски, истакнува директорот на „Филип Морис“.