ФРАНЦУСКО ВЕТО ЗА „МАКЕДОНСКО“ ВИНО НА САЕМ: Грците реагирале, организаторите прифатиле да ја заменат придавката
Објавено во: Македонија 18 Февруари, 2022
Организаторите на Меѓународниот саем во Франција ги прилагодиле термините „македонско вино“ и „македонско лозје“ за вината од Северна Македонија, пишува бугарски „Труд“, а јавува дописникот на медиумот од Атина.
Станува збор за меѓународниот натпревар за вино Citadelles du Vin кој се одржува во Франција, а според бугарскиот медиум организаторите почнале да ги заменуваат термините „македонско вино“ и „македонско лозје“ со термините „вина произведени во Северна Македонија“. Ова следувало по реакција на економската и трговската канцеларија на грчката амбасада во Париз, сигнализирајќи дека тие термини не смеат да стојат во промотивните материјали на настанот.
Поради фактот што терминот „Македонија“ е заштитен географски поим на Грција за вината произведени во регионот на Македонија, овие термини го прекршуваат acquis communautaire во однос на статусот и грчките власти (Министерството за надворешни работи и Министерството за развој на селските реони и за храна) ги презедоа потребните приговори до организаторите, но и до други тела и служби во Франција“, се вели во соопштението на Здружението на производители на вино од Северна Грција.
Инаку во Преспанскиот договор за ова прашање меѓу другото пишува: „Двете страни се согласуваат да им дадат поддршка и да ги охрабрат нивните деловни заедници да воспостават искрен, структуиран и во добра волја дијалог, во чии рамки ќе бараат и ќе постигнуваат заемно прифатливи решенија за прашањата кои произлегуваат од имињата за комерцијална намена, трговските марки и заштитни знаци и за сите релевантни прашања, на билатерално и на меѓународно ниво“.