Германија најде замена за рускиот течен гас

Добивај вести на Viber

Германија се договори со Катар за долгорочно партнерство во снабдувањето со енергија, особено течен гас, објави денеска во Катар германскиот министер за економија Роберт Хабек. 

„Одлична вест е што цврсто се согласивме за намерата за долгорочно партнерство во областа на снабдувањето со енергија“, рече Хабек по средбата со катарскиот емир Хамад ал-Тани во Доха.

Тој додаде дека претставниците на германскиот енергетски сектор, кои го придружуваат на неговото патување во Катар и Обединетите Арапски Емирати, ќе започнат конкретни преговори за склучување долгорочни договори за набавка на течен гас и водород. Хабек отпатува во Катар за да организира испорака на течен гас (ЛНГ), што заедно со најавената изградба на два терминали за ЛНГ е дел од стратегијата на Германија да ја намали зависноста од гас од Русија.

„И ако сè уште не можеме да ја постигнеме целта за независност од рускиот гас оваа година, велиме дека тоа ќе се постигне во иднина“, рече Хабек. Тој рече дека, освен со Катар, за зголемени испораки на течен гас се разговара и со Норвешка и Канада.

Катар е најголемиот светски производител на течен природен гас, претежно извезувајќи во Азија. По нападот на Русија врз Украина, Германија најави дека сака да постигне независност од руските енергетски извори. Земјата во моментов покрива повеќе од 50 отсто од потребите за природен гас со увоз од Русија.