Гевгелиските земјоделци ќе добијат отштета за невремето пред пет години
Објавено во: Агробизнис 14 Февруари, 2014
Последните четири милиони денари ќе им бидат исплатени на 145 граѓани од гевгелискиот регион за претрпените штети на земјоделските посеви од обилните врнежи од дожд и снег, што ја зафатија општина Гевгелија во март 2009-та година, односно пред речиси пет години.
Советот на општината денеска донесе одлука за исплата на овие средства, кои претставуваат 10% од вкупно претрпената штета проценета по невремето.
Ова е последната, трета рата од отштетата утврдена од Владата на Република Македонија, која се согласи да покрие 30% од загубите на земјоделците. Во јануари 2010-та година беа исплатени 15 отсто или околу шест милиони денари, во август истата година уште пет отсто, односно два милиони денари и сега ќе бидат исплатени последните десет отсто од утврдената штета.
