„Гласен Текстилец“ алармира: На удар на работодавците биле трудници, хронично болни и родители на деца до 10 години
Објавено во: Економија 08 Септември, 2020
Здружението
„Гласен Текстилец“ денеска на својата страница на Фејсбук алармира дека вработени
во приватни текстилни конфекции во Делчево добиле паричен надомест под
минималната плата за периодот додека ги користеле владините мерки во борбата за
спречување на ширењето на коронавирусот. Истовремено, во нивната објава навдеуваат дека на удар на работодавците
биле трудници, хронично болни и родители на деца до 10 годишна возраст.
– По добиени сознанија за конфекциите „Крзно“ и „Крзно Делчево“ за исплата под минимална плата за вработени кои користеле мерки во време на пандемијата, „Гласен Текстилец“ поднесе барања за инспекциски надзор до надлежниот Трудов инспекторат за корекција на плата. По извршениот инспекциски надзор, инспекторка од областа на трудот го задолжи работодавачот на двете гореспоменати фирми да направи корекција на плата за вкупно 21 лице кои ги користеле мерките од Владата, пишува здружението „Гласен Текстилец“.
Оттаму појаснуваат дека против работодавачот, е издадено решение и е дадена наредба да се направи корекција на платата во рок од 10 дена, што за нив е доказ за уште една успешна соработка меѓу Државниот трудов инспекторат и „Гласен Текстилец“ во насока на заштита на работничките права во време на оваа криза од Ковид-19.
Соопштуваат и дека вработените од приватниот сектор во овој период биле први на удар, при што меѓу најранливите категории вработени се бремените жени, хронично болните и мајките на деца до 10 години. Од здружението додаваат дека внимателно ќе продолжат да ги следат состојбите, при што со правна помош и поддршка ќе се обидат да им помогнат на сите кои ја бараат нивната помош.