ГЛЕДАЈТЕ СИ ГИ МЕЈЛОВИТЕ - околу 115 илјади граѓани ќе добијат ваучер за домашен туризам
Објавено во: Економија 07 Јуни, 2020
Околу 115.000 граѓани ќе добијат ваучер за домашен туризам, како дел од третиот пакет економски мерки со цел поддршка на туризмот.
Ова на својот фејсбук профил го најави Зоран Заев, лидер на Социјалдемократскиот сојуз.
„Граѓаните кои ги исполнуваат условите за оваа мерка, на својата електронска пошта ќе добијат QR код во вредност од 6.000 денари и упатство за користење на истиот“, пишува Заев.
Да го зајакнеме домашниот туризам, да летуваме дома, вели тој во својот статус.
Како што на својата последна пресконференција најави министерот за здравство Венко Филипче, во наредниот период ќе се размислува за мерки за олабавување, а меѓу нив и за отворање на хотелите. Но, мерките за заштита, како што се носењето маски, држењето на дистанца и честото миење на рацете, ќе мора да се почитуваат.
Неодамна Агенцијата за поддршка на туризмот почна кампања „Дома си е дома“. Хотелиерите од земјава велат дека субвенциите од државата се добра идеја.