Голема борба за да се сопре огнената стихија на Скопска Црна Гора
Објавено во: Македонија 03 Април, 2017
Екипите на Дирекцијата за заштита и спасување како и на противпожарните бригади поради неповолните временски услови со силен ветар и тешко пристапниот терен имаа проблеми во гасењето на пожарот кој беснее на Скопска Црна Гора, а најактивните жаришта се помеѓу селата Раштак и Булачани.
Сафатена е голема површина на сува трева и дрва, информира утринава за Курир командирот на скопската противпожарна бригада, Ѕвонко Томевски. Во гасењето на пожарите се активирани голем број на екипи, а се употребени и „тракторите“ за фрлање вода по воздушен пат.
- 30 луѓе активно се на терен, а зафатени се околу 500 хектари површина. Пожарот се шири на три страни, но нема опасност за куќите во селото. Очекуваме поддршка и од воздух и сме во комуникација и координација со Дирекцијата за заштита и спасување, вели Томевски за Курир.
Од МВР информираат дека пожарот кај нив бил пријавен вчера околу 13:30 часот на местото викано Кашлица, атар на село Булачани. Според информациите со кои располага Министерството во пожарот зафатени било едно бачило и една викендица.
Во меѓувреме пожари избија и на повеќе места во Скопје, како и на Голак. Вчера попладне таму почнала да гори борова шума, а состојбата таму е критична бидејќи пожарот е потпален од неколку страни и се проширил и кон Пехчево и Берово. Пламени јазли имаше и во Вевчани.