ГОТОВ РЕБАЛАНС НА БУЏЕТОТ: Администрацијата нема да се чепка, за граѓаните пари и ваучери за трошење
Објавено во: Економија 15 Мај, 2020
Предлогот за ребаланс на буџетот за годинава најверојатно ќе биде готов денеска. Со него се зголемуваат расходите на првично испланираниот за годинава поради потребите со фискални мерки да се помогне домашната економија која силно е погодена од кризата предизвикана од пандемијата на Ковид-19.
Нема доволно детали за колку ќе се зголеми буџетот, но јасно е дека буџетските приходи во април се намалија за 20 отсто. Во меѓувреме Владата донесе два пакети за помош на стопанството, а веќе се подготвува и третиот сет мерки за кој Фактор вчера ексклузивно објави детали. Според информациите со ребалансот нема да се кратат платите на вработените во јавниот сектор.
За ова прашање имаше сериозна дебата и негодување од дел од јавноста но кај креаторите на политиките преовлада мислењето дека тоа сега не е потребно.
Владата ќе предвиде дополнителни 355 милиони евра за третиот сет економски мерки со кои ќе ги помага и граѓаните и стопанството. Дел од овие пари нема да бидат од буџетот туку од фондови, но сепак најмногу ќе се буџетски средства.
Во овие мерки како што известивме има поддршка на граѓаните кои се невработени, но и на студентите, средношколците, земјоделците. Има помош и за стопанството која ќе е во вид на кредити или гаранции за кредити. За невработените е предвидена помош од 150 евра на домашна платежна картичка која ќе чини 25 милиони евра.
Според основното сценарио на Министерството за финансии за годинава се предвидува забавување на економската активност за минус 3,4 проценти со тоа што ефектите од корона кризата врз економијата, се очекува да бидат најголеми во второто тримесечје, во третото се очекува забавување на контракцијата, додека во четвртото закрепнување на економијата и раст.