Град Скопје ќе има помал буџет и ќе собере повеќе даноци следната година

Добивај вести на Viber

Град Скопје следната година ќе има помал буџет поради пандемијата, но ќе собере поголеми даночни приходи, според предлог-буџетот за 2021 што го објави Советот на градот.

„Во услови на значајно влошување на меѓународното економско окружување и голема економска криза, резултат на здравствената пандемија, Буџетот на Град Скопје за 2021 година е подготвен применувајќи ги начелата на економичност, рационалност, фискална одговорност, отчетност и транспарентност, во насока да се обезбеди извршување на сите законски надлежности на Градот Скопје, со подобро буџетското планирање и извршување“, гласи соопштението на Град Скопје.

Буџетот ќе биде помал за 670 милиони денари и ќе изнесува 7.199.000.000 денари. Споредено со 2020 година, предложениот буџет на Град Скопје за 2021 година, се намалува за 8,5 отсто. Во предлогот се планира и дел од вишокот на приходи остварен во минатигодини, во износ од 477.000.000 денари.

„Планирањето на средствата преку дефинираните програми допринесува за поголема транспарентност на планираните и извршените расходи како и нивно рационално користење“, велат од Советот.

Даночните приходи ќе изнесуваат 2.666.000.000 денари и ќе бидат поголеми за 11,4 отсто. Капиталните расходи пак се намалуваат за 5,3 отсто и ќе изнесуваат 2.384.484 денари.