Гришко: Фрлените балетанки се со техничка грешка, фабриката работи

Добивај вести на Viber

Од компанијата Гришко потенцираат дека фрлените балетанки на локалната депонија во Демир Хисар се со техничка грешка при производството и дека фабриката продолжува да работи без никаков застој или финансиски проблеми.

„Причината поради која балетанските обувки завршија на депонија е од технички карактер. Тоа се дефекти кои настанале во производството, станува збор за рачна изработка. Сите големи компании во случај на грешка од технички карактер ги повлекуваат назад своите дефектни производи и истите не смеат да бидат пуштени во продажба. Се работи на нарушување на технологијата во производство од страна на вработените. Поради тие причини обувките се класирани како дефект. Станува збор за обувки кои се внимателно сортирани и се собрани од изминатите три-четири години. Бројот на вработени е непроменет. Фабриката ќе работи нормално по нормален тек. Продажбата ќе се одвива како и досега. Како ќе се зголемува побарувачката така ќе расте и бројот на вработени. Многу е тешко во мало место како Слепче да се најде квалификувана работна сила, сепак станува збор за специфична работна изработка на обувки, потребен е доста голем период за да се обучат вработените, а за време на обуката се оштетуваа голем број на обувки. Овој проблем го имаме и во Москва иако е голем град. Од нашата фабрика во Слепче се извезуваме во над 40 земји низ целиот свет, а најмногу во Европа, па затоа нашата компанија има продавница и магацин во Прага, Чешка. Нашата фирма има подарувано обувки во повеќе наврати на македонски балетски училишта, но не им подаруваме обувки со технички дефект, туку со козметички, ситни, незабележителни детали“, велат од Гришко. 

Претходно Фактор објави историјат на инвестицијата на Гришко во Република Македонија, додека пак за информацијата за фрлените балетанки се повика на останатите медиуми кои вчера ја објавија веста.