ИНИЦИЈАТИВА ЗА РЕФОРМИ: Никола Груевски ја краде визијата на реформаторите

Добивај вести на Viber

Од внатрепартиска иницијативата за реформи во ВМРО-ДПМНЕ велат дека на вчера одржаната конвенција на ВМРО-ДПМНЕ, за претставување на кандидатите за локалните избори, пред членовите на партијата и пред целата јавност, Никола Груевски презентирал некоја негова визија за како треба да се движи партијата. 

„При тоа, Никола Груевски буквално ги украде јавно презентираните заложби на Иницијативата за реформи на ВМРО-ДПМНЕ и нејзините декларации, а особено Декларацијата Европско ВМРО-ДПМНЕ за Европска Република Македонија. Добро е што конечно Никола Груевски прифати дека се потребни значителни реформи во ВМРО-ДПМНЕ и ја препозна јасната визија на Реформаторите, сепак потенцираме дека тој нема кредибилитет ниту во партијата, ниту во јавноста да ги реализира овие реформи. Нова визија во партијата и во Република Македонија ќе има, ама без Никола Груевски. Крадењето на една напредна визија за иднината на паријата и државата, само по себе покажува дека Никола Груевски повеќе нема капацитет за лидерство, кое е потребно во овие моменти. Реформите во партијата ќе произлезат од волјата на членството и ќе бидат континуитет на идеалите на историското ВМРО на кое ВМРО-ДПМНЕ е наследник. Новата сила на ВМРО-ДПМНЕ доаѓа, а во неа нема место за луѓе без идеи и капацитет“ - наведуваат реформаторите. 

Реформите ќе победат, ВМРО-ДПМНЕ ќе биде модерна и демократска партија за сите граѓани, додаваат во соопштението.