ЈАВНОСТА ГНЕВНА ПОРАДИ БОНУСИТЕ: Се потпишува интернет петиција за смена на членовите на ДИК
Објавено во: Македонија 08 Декември, 2017
Повеќе од 1 600 граѓани ја потпишаа интернет петицијата со која се бара оставка од членовите на Државната изборна комисија затоа што сами на себе си доделиле дополнителна плата за уште четири месеци поради ангажирање на локалните избори во октомври оваа година.
„Бараме оставка од 9 члена на ДИК поради неморален однос и кршење на принципите на работа, објавени на веб сајтот на ДИК, кои меѓу останатото гласат: „Постојано вршиме само-евалуирање, затоа што сакаме постојано да ја унапредуваме нашата работа и секој нареден изборен циклус да биде подобар од претходниот. Притоа ја зголемуваме ефикасноста, ја спроведуваме работата со помалку напор, и ја зголемуваме ефективноста со што ги намалуваме трошоците за својата работа.“, се наведува во петицијата.
Платата на деветте членови на ДИК е помеѓу 60 000 и 70 000 денари, а во изминатите 18 месеци тие трипати сами на себе си доделиле вкупно 12 плати, за што не ја информирале јавноста.
Овој случај го откри американскиот амбасадор во земјава, Џес Бејли, кој во вторникот обелодени дека дознал оти членовите на ДИК на седница зад затворени врати си поделиле четири дополнителни плати после локалните избори во октомври.
Ден подоцна, ДИК одржа седница на која е заклучено дека одлуката за тие исплати била согласно Изборниот закон и Правилата на работа, но под притисок на јавноста одлучиле парите да ги вратат во буџетот или да ги донираат.