Ќе има брзи промени на Законот за референдум

Добивај вести на Viber

Министерството за правда започна постапка за изработка на предлог измени на Законот за референдум и и други облици на непосредно изјаснување на граѓаните кои треба да бидат готови до крајот на овој месец. Зачудуваат неколку моменти во оваа постапка меѓу кои краткиот и брз рок предвиден за достава на предлози на законските измени, како и тоа што во нив нема да биде овозможен јавен увид и јавна расправа.

Според поставеното образложение на Електронскиот национален регистар на прописи на Република Македонија, цел на предлог законот ќе биде надминување на постоечките проблеми поради неусогласенот на законското решение со Изборниот законик и Законот за судовите.

Референдумот е облик на непосредно изјаснување на граѓаните во одлучувањето за одделни прашања од надлежност на Собранието на Република Македонија, за прашања од надлежност на општините, на градот Скопје и на општините во градот Скопје, како и за други прашања од локално значење.  

На референдумот граѓаните се изјаснуваат непосредно со тајно гласање. Право на гласање на референдум имаат граѓаните кои имаат избирачко право и се запишани во Избирачкиот список. Референдумот се распишува заради одлучување на граѓаните или за консултирање на граѓаните. 

За референдум овластениот предлагач може да води јавна пропаганда на свој трошок. 

Референдум на државно ниво задолжително се распишува за усвојување на одлука на Собранието за менување на границата на Република Македонија и на одлука за стапување или истапување од сојуз или заедница со други држави.

Досега во историјата на Република Македонија се одржани два референдума на државно ниво, тој за независноста во 1991 и за територијалната организација во 2004 година.